الناس منجرفه مع الأسهم وكم زاد الرصيد

هذا يصفيها وذاك يبيعها ويردها

وانا على رجواي لاني مستفيد ولامفيد

مدري متى علمي بجواد الفلوس وعدها

لاكن على ماقال ابو صالح حمد صالح سنيد

الله يلعن حاجة الدنيا ويلعن جدها

الحاجة اللي من ورا حبة خشم شخصٍ بليد

مارضى بها والناس ماترضى ولاهو قدها

صحيح ماعندي رصيد فلوس لاكن الأكيد

ماعاد عندي كون عز النفس ليه اهدها

انا عزيز النفس وازيدك بعد راسي عنيد

يبشر رفيقي بالسعد وعداي تمسك حدها

ما ارافق الرجال متمصلح لجل ماله يزيد

عيني قسم بالله في مخبى الرجل مالدها

ارافقه لاسار راسه طيّب وشبحه بعيد

ويمناه تعطي مادرت يسراه وشهو مدها

وليا حكيته سر ماكنه سمع شيٍ جديد

يعني خلاص السر في نفسٍ بعيدٍ سدها

هذا رفيقي وان حصل ولا فخلوني وحيد

خلوني امشي في هوا نفسي واحقق ودها

لبيييك ياملهم فكر راسي على بدع القصيد

ياللي على شانك بيوت الشعر تاصل حدها

في ذمتي ذمه لو انحت لك على وجه الجليد

بيتين ياوجه الجليد يذوب قبل اعدها

ويمكن لو اكتب لك بعد بيتين باطراف الحديد

يصبح حرير وهو تموت النار عاده ندها

الله حسيبك كيف صرت اعذر وانا باسي شديد

اصبحت اسامح زلتك وقول :هذي عدها

عذرك ينسيني خطاك الأمس يالدر الفريد

عذرٍ لو تداوي به اجروح المريض يبدها

دايم تعز الوصل ومقدى على الراي السديد

لاجبعت بقعى حبال الوصل قمت تشدها

الله عطاك الزين والعفه وعادك سيد غيد

والله صخرني لك محبه وانت منت بضدها

اسمعك بيتين وانت تقول بالله عيد عيد

وعيدها وعيدها وعيدها واردها

كله على شانك قسم بالله ماهي لحية نشيد

يسقى على ذيك اليالي قبل تفهق يدها

يوم اليالي كنها من بيننا ساعي بريد

كنها تعلمنا وش اللي بيحصل في غدها

واليوم لاساعي بريد يفيد والا يستفيد

كلٍ يبي يقطع علاقة ودنا ويهدها

لاكن فمان الله واشوفك ضحى العيد السعيد

عشان احصل لي عذر وعداي تمسك حدها