علّة العشّاق 252 طلبتك يا اله الكون في شمسٍ تجي باشراق طلبتك تغفر ذنوبي وللظلمه تجلّيها طلبتك تفرج الضيقه وتفتح لي قفل الارزاق وتستر باقي عيوبي ولاتظهر خوافيها يضيق الصدر والخاطر وعزّي للصدر لى ضاق وعزّي للذي لى ضاق دمعاته يداريها متى والى متى وآنا آتحمل حمل ما ينطاق حمل يعجز يشيله من جبال طويق راسيها يقولون السهر يبري هموم وعلّة العشاق وانا آقول السهر زوّد جروحٍ كنت اداويها وانا يومٍ سمعت اللي يغني قمت له منساق وانا مدري وش اللي ساق باحلامي واما نيها سألته ويش غنّى بك وانا اللي خابرك عملاق وكانك مضرب امثال الشجاعه وانت راعيها تلفّت صوبي وهلّت دموعه واغرقت الاحداق وعلّمني بكلمه واحده ماني بناسيها يقول الوقت والغربه وحب اللي نوى بفراق ونفسك لى قعدت بحب من تهوى تمنّيها دعتني ليلة الجمعه ورحت وللقاء مشتاق ابى اشوف الغزال اللي سبت قلبي خطاويها وبي فرحه مثل فرحة سجينٍ منحكم باطلاق او انها مثل فرحة والده تفرح بغاليها وجيت يسوقني صوب المنازل تبعها سوّاق مقادير الزمان تسوقني من شان الاقيها وساعة شفتها ظنيتها متشوقه لعناق على خبري كما كانت تماريني واماريها ولا كنت احسب ان غدر الجميله مرّ ما ينذاق أو انها تطلب فراقي بكلمه ويش حاضيها ذرفت الدمع مدري حزن او فرحه او انه عتاق من ذنوبٍ كثيره عفت انا اولها وتاليها وانا ما هزّني مثل الصدر الابيض ومثل الساق غزالٍ خطوته تلعب بذي الدنيا ومن فيها سلام الله على بنت القبايل طيبة الاخلاق سلام الله على من هي خذت قلبي بطاريها اعرفك قلبك القاسي جبل ما هزّته الاشواق اعرفك كلمتك تسوى قبايل يوم قلتيها واعرفك لى تمنيتي تمنيتي من الاعماق ولابه دعوتٍ زينه عشاني ما دعيتيها وانا من لابةٍ ماهي تخون اذ ا عطت ميثاق رجالٍ لي عطينا العهد والكلمه نوفّيها ولكن حسّني فعلك وما يكتب على الاوراق من اشعار وعباراتٍ على شاني كتبتيها عسى البارق مع صادق مزون من الحيا تنساق على ديرة هنوف اللي مقدرها ومغليها سلام الله على بنت القبايل طيّبة الاخلاق سلام الله على شوقي وديرتها واهاليها
ملحمة نجران