لابتي بين القبايل لهم مجـد ٍ وصيـت

ما اعتزى الحيدر عليه السلام الا بهـا

لابتي يامية(ن) درع جنبي لاعتزيـت

زلزلت بيبان لاتـراك روس حرابهـا

لابتي سيل ٍ يدم الجـذا فيمـا بغيـت

لي عوت في نايفـات الرجـوم ذيابهـا

محزمي في كل هيه وسيفي لي عديت

تزبن الخايف وتاطـا علـى حرابهـا

الرجا في الله رجيته ولا غيره رجيت

واسع الرحمه يخلص جميـع انشابهـا

جارت الدنيا والايام دارت وانكويـت

واقبلت سـود الليالـي بسـود اثيابهـا

تخلف النية ونا صادق ٍ يوم انتويـت

مخلفـات الظـن يـارب تكفينـا بهـا

ونتي يوم اتذكر زمان اللـي هويـت

يوم خذ روحي غزير الهدب واقفا بهـا

غبّته سبعين قامه ونـا فيهـا غديـت

والسفينـه غارقـه واغرقـت ركابهـا

ماحكيت بسر زين الوصايف ما حكيت

بعض الاشيا يالاجاويـد مـا يحكابهـا

والله اني يوم عاهدت مضنوني وفيت

من عطـى خلـه عهوداللّـزم وفّابهـا

جادل ٍ في حبها لاسمعت ولا وعيـت

لو يجون الترك والفـرس دون ابوابهـا

ياسلام الله عليهـا بتالـي مـا بنيـت

عد من زار المدينه ومـن صلـى بهـا