حنّا ليامنّا كسبنا الملايين

تبقا لعطران الشوارب وداعه

نفرج بها همٍ ونقضي بها دين

وانخص بالمدّه ضعيف الجماعه

هذي عوايدنا على العسر واللين

يوم الردي جدّه يغطّي متاعه

نخلي مراحينٍ ونملا مراحين

واغلى كنوز العمر كنز القناعه

واليا عطانا الله عطينا جريين

نقضي على المليون في ظرف ساعه

وان عاضبت ليّام نظفر بثنتين

ثنتين مايقدر عليها الرعاعه

صبرٍ على عجفا القريبين الادنين

وسترٍ على من شيّن الله اطباعه

الله جعلنا من خلقنا ثريين

عند العرب لوكان حن في مجاعه

ابيوتنا ملفا عيال المساكين

واقلوبنا تثبت نهار الشجاعه

والياجلسنا فالمجالس سلاطين

والى ركبنا من معه عمر باعه

صبيان يام مهجدين الشياطين

كم حاكمٍ شرهٍ هدمنا قلاعه

ماحن نخلّي واجب المستحقين

ولا نعرف الفبركه واللكاعه

بالحظ ناطى مدهر الخد وايزين

أجواد مافينا معمّر قلاعه

نصدق– والى منّا هرجنا تقيين

ونصد عمن لانحب استماعه

والياظٌلمنا نطلب الله واتبين

حوباً على الظالم عجولٍ سراعه

اسرع من البارود واصدق من العين

مايمنع الظلاّم منها مناعه

ندرا العهد لملوك نجد العريبين

ولا نبر اصحابنا بالقطاعه

والفوز يابن افطيس ماهو من الحين

صفٍ تجي به مايجيه انهزاعه

من صلب شيبانٍ عزازٍ وشرهين

ربّوك في بيتٍ وساعٍ ارباعه

برهنت لضعاف النفوس الدنيين

بيّاعة الذمّه ارخاص الوداعه

أن يام في صعب المواقف عزيزين

مهما حصل مايقبلون الدناعه

ومن فاز بالدنيا ولافاز بالدين

اكيد ماله عند ربّي شفاعه