قصيدة الشاعر فهيد بن شافي بن مبخوت العجمي

قالها في الملك فيصل

يا الله يا موجود يا والي الجـود

ياواحـد فـوق السموات عالـي

الخالق المعبود ما سواك مــعبود

بجـود جـودك يا عظيم الجلالـي

دوم نتحري مدتك وانت ابـا الـجـود

ولولا الرجـا بـك ماقنينـا الحلالي

نرجيـه ليـل يعجب العيـن ياسعـود

يضـفـي لـكـل المملكة بالكمالي

يقبل يسوقه عامل البرق ورعـود

ريض وتنقـر لـه هــوب الشمالـي

منـه خبـاري الصلب حـود ورا حـود

توهلـت حتـيـاه مبهـل وسالي

ليـل يشـوق العـين مـامنـه منشـود

يصبح وهـو فـوق الصـفيه يلالـي

دور السبوع الـعـود يزمـي علـى العـود

ثـم اشـتبك نبـت الـوعر والسـهالي

ونرحـل وننـزل مـنـزل يعجـب الـذود

جـاز الجنـاب مبعدات المفالي

لا روحـن مـن خـايع جـن يـبــود

ويـجـن قبـل الحيـل كـل المتالـي

مكيفات والشحم صــــار بــــــه زود

وزانـت مشـاهيهنا علـى كـل حـالي

واستانست هزعـا الرجيـل ام عنـقـود

اللـي محبتهـا تـسـاوي عيالي

بسيف نطـاح الـهــم نـاطح الكـود

نــطاح منـا المعضـلات الجزالي

بسيف فيصـل مـركـز الطيـب والـجـود

اللـي لنـا بـرخص ثمـن كـل غـالـي

جعلـه علينـا دايـم الـدوم مـوجـود

يبقـى علـى الـدنيا سنين طوالـي

هـو درعنـا الضـافي وحنـا لـه جـنـود

ولا غيـر فيصلنا لنـا راس مالـي

فرز الوغـا متـورث الجـود مـن عـود

اسـره عــساه يـجـي لـهـا اول وتـالي

صلاة ربي عدد ما هبـت النـود

علـى النبـي عـدد حقـوق الخيالـي