أنا لي بديت الرجم وأمعنت في النظر

على تجربة وأعل من كل صافيه

يا لولا الفرايد ما بدعت القصايد

ولولا شفاة الروح ما جات شافيه

ولا خير في قاف على غير معنى

ولا خير في المعنى على غير قافيه

تغربلت في الدنيا ولاني بكاره

وتكادرتها حتى لو أنها مصافيه

ومرتني الدنيا على هودج الرخا

ومرتني الدنيا والأقدام حافيه

ومرتني الدنيا وهي تبتسم لي

ومرتني الدنيا وهي لي مجافيه

تراها إذا زانت تمام خداجها

وإن كان شانت خدّجت كل وافيه

وترى لأقبلت تضفي على كل عاري

ولي دبرت فمعرية كل ضافيه

أحيان سودٍ بالمواليف مقفيه

وأحيان بيضٍ بالمواليف لافيه

أن استطرت للخيل ما تلتحق لها

وإن استرقدت للذيب ما هي بغافيه

تراها ليا رفت لغر بعينها

غرور وللزلات ما هي برافيه

وتراها إذا أومن العشاشيق كفها

لا هي بمكتفيه ولا هي بكافيه

عليها العفا يا ويل من لا يعيفها

ومن عف منها في نعيم وعافيه

ألا غير مأسوف على عالي البنا

بتبني على عالي البنا كل سافيه

ويا بعد ضو الليل يا ساري لها

لا هي بمشبوبه ولا هي بطافيه

عسى الله على الدنيا بعونه يعيني

ويا جعل ما نفسي عليها بهافيه

يطلق عقال الرجل منها طلاقها

بثلاث بدون شهود في الصدر خافيه