ان كان بعض الناس غاوي وناويك

بالكلمه اللي مايجود رسنها

فخله الين انها توصل مناويك

ثم اخزمه حتى انه يدفع ثمنها

بالحق خذ حقك وتشكر مساعيك

ثم انسها مدفونة في كفنها

لاعاد تنبشها فتكبر وتذيك

ماعاد تعرف شرقها من يمنها

ولاتمدح افعالك على اللي حواليك

يمكن فروض خاليه من سننها

واحذر من اللي دايم الدوم يعطيك

معلومة مغلوطة محتظنها

لاتسمع اقواله بهذي وهاذيك

يمكن كذوب كلمة ماضمنها

واحرص على اللي في المواقيف يكفيك

عن عشرة لاجا الحضا جزت منها

احرص عليه وقدره في حكاويك

وان جات منه الزالفه صد عنها

تكفى تراه اللي فعوله تنسيك

غثا الحياه اللي ماحد قد ومنها

تنعشك وقفاته لما حان حاضيك

واهل الفعول الغانمه ماطمنها

ان جا لزومك يحتظي لك وياتيك

ماغيرت طبعه صوادف زمنها

هذا الرفيق اللي عن الناس يغنيك

اما الردي صن رفقتك منه صنها

‬