تهيضت مما في ضميري وقلت ابيات

عساها توضح كل ماودي اقوله

مواجع دفينه كل ماقلت راحت جات

بوسط الحشا وتراقب القلب من حوله

هواجيس سفاحه تذكرني اللي فات

لما جيت بسلى ترسل سهوم مجهوله

لها غارة دايم تسم البدن بسكات

وكل اجندتها تنفي اتكون مسؤوله

وتوقيت هجمتها لها بالزمن حزات

لما نامت عيون البشر جات مسلوله

سبايب غزال مسكنه في صميم الذات

ابو قامة غنجا وجمرات معسوله

رحل والخفوق يكززه واهج العبرات

مع الهم والغربال والروح معلوله

حشا مالقيت لها وصيف من الخفرات

عيون المها والليل في نفح مجدوله

لها هامة مثل الفرس تعشق الغارات

مع فارس ماتصهل الا على زوله

وجودي عليها وجد قرم عضيده مات

لما انه نظر في جثته جات محموله

ولا له جدى الا عبرته تجذب الونات

على اللي رحل عنه والاوجاع مدبوله

انا دونها كن الهويه بدون اثبات

وحيد لحالي والمجاديف مشلوله

وكن حبها مستهدف خافقي بالذات

حصد كل مافيني وانا صرت محصوله

وهذي نتيجة كل ماصار من لوعات

قتيل الهوا مقتول من سهم مجموله