مع رقصة الهردا بدت هبة النود

نود ما ناش غبارها كل سالي

ما ناشت إلا كل وجع ومكمود 

قلبه من الآلام ماهو بخالي

في عيد والمفروض في قلبي اسعود 

ومع رقصة الهردا فراقه طرالي

مع رقصة الهردا علي لجت رعود 

ولاحت بروق في السماء من شمالي

وثارت براكين وظهر ريح بارود 

تعلن حروب أحزان وقت مضالي

يالله دخيلك رب ما عاد ابي زود 

يكفي من جروح الزمن ما جرالي

حزن الفراق لغالي صار مفقود 

من رحمته لي كان يدمح خمالي

حتى خطاي اللي علي منه منقود 

يطمر سياجه حتى لو كان عالي

والخافي أعظم ما لحسناته حدود 

ولا اذكر إنه قال ذالك وذالي

وعندي لكم مع ما ذكرت آنفا زود 

عندي لكم ما هاض نظم الشقا لي

عبد رضيت بما قضاء خير معبود 

وعاصي سواه ورافض ما قضالي

وأمر قضاه الله ما عنه مردود 

حتى نهار البعث وقته دنالي

واستنقضت الأوجاع من قاعة لحود 

وقوم علي يوم القيامة لحالي

وصرت استمع لصوات نغمة وتر عود 

وكن نايح الورقا يرد العزالي

وانشلت الأقدام وانهدت سدود 

سبة غياب طال لصغر عيالي

نجم السعد لولاه ما باحت سدود 

ولا غنت الهردا بدل رقصها لي

وكل الزلل مرجوع والنقص مردود 

واللي معه لي وداعة يردها لي

قلته وانا في عين لعصار موجود 

سنه وشهرين برجوا الوصالي

والله وخلق الله على علمي شهود

عسى العوض فيما مضى ما بقالي