ياليل ليت الحياه تدوم بعد الفجر

واعانق النور وارسم للحياه الحياه

ياليل يكفي من العتمه قلوب البشر

لو لبست من الثياب البيض ثوب الصلاه

عايش من الذنب ومن المسلمين فحذر

بالله وين السلام الي صدق محتواه

عن التواضع تسولف لك وجيه الكبر

وعن الوداعه يسولف جاحد أمه وأباه

وعن الشريعه يسولف لك عديم الفكر

يلوي رقاب الفتاوي لين ترضي هواه

والعاقل يقول عاد القادم أدهى وأمر

بالله يأهل القلوب البيض ويش السواه ؟

لقيت صدق المراحب في بيوت الفقر

ولقيت زيف التكلف في بيوت الغناه

وانشهد إن الفقير الي فقير الذكر

الي مع الغانمين مضيع الاتجاه

وعرفت كيف القناعه تسكنك في قصر

لو شحت الناس والدنيا تفض الصفاه

وايقنت بن أجمل الردات حمد وشكر

للمعطي الي يغفر الذنب للي عصاه

وامنت بن أعظم الأرزاق عفو و ستر

وّكرامتن تمْنّك ملّي قليل حياه

تبقى الشدايد طريق الوافي المختصر

لو شفت راعي الرخا متفشلن من حكاه

ولا أعظم من الشجاع الا شجاع اعتذر

قام ونصر نفسه من الذل واظهر خطاه

والي أخوانه معه عزالله إن له ظهر

يثبت على طاعة الله ويتجاوز اعِدّاه

موسى بقدره الهيه يشق البحر

ضحا بفرعون بأمر الله واخيه وعصاه

والخاتمه خاتمة من راح وسط القبر

بيشل ماقدّمه ويخلي الي وراه