يامسافر للخارج تريد الدراسه

تبغي تجيب العلم من عند لنقليز

ياكثر مافي بلادنا من فراسه

علم الشريعه علم دينك وتركيزّ

ومادمت ناوي العلم تبغي التماسه

بابلاد حمران العلابي هل ابليز

اخذ العلم منهم مقابل سياسه

ادعهم للأسلام بفكرٍ وتركيز

واسمع وصاة اللي كبيرٍ وراسه

غاشيه شيب وناظره ممتلي ميز

قد داج ببلاد الاجانب وحاسه

يمشي بدربه سالك ومرةٍ شيز

اوصيك حاذر من دروب الخساسه

حيث ان بلاد القوم مليان تغريز

وانصحك من خوة شبيه البساسه

يرديك بالهونا وتصيرله بيز

وانذرك من تبعة ذلول الهياسه

تغريك ّغَي ودينها دين بيريز

واحذر شراب اللي يسمى وناسه

امجامله والا بمرقص دهاليز

ايخلي الرجال يفقد حواسه

بعد السنام ومركبه يردفه عيز

ويروح عمره مخلف من اساسه

مابين هيف وسيف ويموت ماجيز

تمسّك بدينك وحاظ الغراسه

تقطف ثمر حِفظك معزّه وتحريز

تفوز بعلم ونعم وايضا حماسه

مع طيب ذكر وطيب خوه وتحفيز

ولاترافق الاّ من عنده كياسه

يغنيك من خوة كذوبٍ ولمِيز

وجمعى الربوع بعطلتك والأناسه

والذيب ياكل كل مفرد وخزيز

واياك تنسى شايبك ذوالرياسه

وامك واخوك ودم جوفك بتمييز

يدعون لك في كل ليل ٍ دماسه

علك تعود وترفع الراس بك ميز

واذا انتهيت فخل عندك حماسه

تعود للديره على اول ايرلويز