ياراكب من عندنا شقران

سواج مواج بعيد المراحِ

ينشر من القرعا على قد الاذان

والعصر تشوف لك خشوم وضاحِ

كز القعود للشيخ من نسل وطبان

زيزوم علوى مبعدين المناحي

الذم مايهفى للأجواد ميزان

والمدح مايرفع ردي المشاحي

بشر ليا جيته بكبش من الضان

ودلال فيهن أشقر البن فاحِ

يمشي وينشد عن منازل فنيسان

يبغى بدارى قامة وانبطاحِ

الدار حاميها الولي رافع الشان

من حمد ربني سدّنا مايباحِ

الدار نحماها بخيل وفرسان

ياهل القنازع دايثين الملاحِ

با الله عليك امسيت يانسل وطبان

تصبح عليك من الهواشهم صباحِ

مخيّله تاتيك من صوب نجران

مشروبها سم ذبوح ذحاحِ

أول مطرها رشة الخيل باكوان

ترمي العشا للطير رفض الجناحِ

خليت عشب الصلب يومي بالرادان

تلعب بريضانه هبوب الرياحِ

العذر منك يالصبي يابن درجان

حنا فهقنا الكون نبغي الصباحِ

ياما حدينا عند حلوات الألبان

وياما كسرنا قفوها من الرماحِ

لا ماركبنا فوق طوعات الأنسان

عدونا يبطي وهو ما استراحي