يا فاطري ذبى خرايم طميه

يوم ازبعرت مثل خشم الحصاني

ذبى طميه والرياض الخلية

وتنحري برزان زين المباني

خبي خبيب الذيب مع جر هديه

لا طالع الزيلان والليل داني

تنحري لطام خشم السرية

فرز الوغا لا جا نهار اللوحاني

محمد لزم علينا مجيه

قبل البعيد وقبل الأقصى وداني

وأنا قضيت اللازم اللي عليه

اللازم اللي ما قضاه الهداني

وتذكر المشحون ديران حيه

مسوا جبال أكوارها بالمثاني

الجدي خله فوق ورك المطيه

بنحورها يبدي سهيل اليماني

نبغي ندور طفلة عسوجيه

ريحة نسمها كالزباد العماني

لي صاحب ما نيتي عنه نيه

واثره قضاله حاجة ما تناني

ليته صبر عامين ولا ضحيه

ولا تنشد صاحبي ويش جاني

أما قعد راكان في المهمهية

ولا يجي يصهل صهيل الحصاني

واشره على الطيب ويشره عليه

ورواه جوز عشقتي مأتناني

روحي وأنا راكان زبن الونيه

ما يشرب العقبات كون الهداني

وعدونا لازم نجيه بهديه

ملزوم نجعل حلته مرمهاني

لا بد ما يفجع صباح بهيه

ويصوي كما يصوي مجدع الأذاني

شتات شمل الضد حتم عليه

فرض عليه مثل صوم رمضان

لا بد من جمع يزرفل كميه

جمعونا تاطا القبا والبياني

في ساعة كل يهمل الحويه

لا شاف ضرب مصقلات السناني