خلوني أقعد في هبوب الجنوبي

اللي يداويني بليا تخاتير

أحب عندي من الأبر والحبوبي

نودٍ تجيني بدية الشمس وعصير

في ربعة ما بيتها بمحجوبي

في ربعة تكثر عليه المسايير

الماء قراح والسمر لي شبوبي

وأحب من ليحانكم والدوافير

من يوم تظهر لين يأتي الغيوبي

دق وحمسٍ للوجيه المسافير

سالة عبالم وسالة ذبوبي

سالة ونقع سيلها في المحاوير

يعنك لا جيت الشفا ليه معروبي

مثولثات غاديات مقاطير

تبنا لهشال الخلا والعزوبي

بيوت ربعي حاملين المخاسير

أنا علي جي الكويت مغصوبي

وأجيه من حب القروم المناعير

طيور مجانيها علاوي الهضوبي

هديتها معا طيور الصقاقير

طير لا منه هد ليه هيوبي

وإن هدبه راعيه ما هدف الخير

وطير لطوم وللضرايب عطوبي

وما ناش منه سم حتى الأظافير