قد قال لي سلطان شقر الجدايـل

راعي المحبه يا ابنالاجـواد مذلـول

لا تحسب ان الهم في القرب زايل

اخاف مـن هـمٍ تشيله علـى طـول

ترى الهوى ماريتّـه و الدلايـل

دمعٍ يهـل و خاطـرٍ دوم مشغـول

والحب ماهو بالحيل و التحايـل

ما للخلايـق فيـه قـوه و لاحـول

جف القلم يـا ناقليـن الرسايـل

وطيف الغضي جاني معا الليل مرسول

والعاذليـن ايعقـدون المسايـل

و احباب قلبي ما استمع فيه مالقـول

واللي جرح قلبي و عيني تخايل

ابا اعشقه لـو قالـوا الناس مهبـول

خلّي سمي الرايحـات الهمايـل

مزيون باسم و جسم معنى ومدلـول

أشعلت له باقصى حشاي الذبايل

يوم انطفت شمعة هـوى كل مجمـول

ونجل العيون الداعجات الكحايل

يوم الوداع ارخت علي حد مصقـول

والليل الاظلم و النجوم الشعايـل

صارت تغيا لي خلاخيل وحجـول

اخشى تموت ورود جر المسايل

اذا تـحـدر وادي العرض بسـيـول

انا اللذي حبيت وافي الخصايـل

وانا اللذي عن كل ما صار مسـؤول

حبيت منقوش الكفوف النحايـل

حب النقى يـا عاذلـي ويش بتقـول

معذور يوم الفت فيـه المثايـل

ابـو دليـقٍ فـوق الامتان مجـدول