مسراح يوم العيد حسب العوايد

لبسوا ثياب(ن)بيض وقلوبهم سود

وبرد الوجيه اتشب تحته وقايد

كن في ضمايرهم من الحقد بارود

وكم ضحكة(ن)تخفي وراها مكايد

احقول اﻻلغام اكتست عشب وورود

سنين والحقد الدفين ايتزايد

كن البرا ما بين اﻻخوان مردود

تسالموا عجلين واقفوا شرايد

ﻻ ذا بطراد(ن)وﻻ ذاك مطرود

امجاملات(ن)ماهي اﻻ مصايد

جعله يطيح بحفرته كل مقرود

ما تنزل من الله عليهم موايد

تنزل عليهم طير ابابيل بحيود

تواعدوا يا مخلفين الوعايد

واذا اجتمعتوا ريشة(ن)هبها نود

العيد ما هو بالثياب الجدايد

العيد ترضي صاحبك عقب منقود

وان كان قلبك ما صفا ﻻ تعايد

العيد بك وﻻ بلياك بيعود

غرتكم النعمه يا مال الشدايد

كلن يقول ان حن هل العز والجود

اتدورون النعم والنعم كاااااايد

وفي زودكم نقص(ن)وفي نقصكم زود

لي طاح راس(ن)ما اعنزته الوسايد

وﻻ ينفع العاجز تواريخ وجدود

الحسد قانص والنوايا طرايد

والسالمة تضلع وفي جنبها عووود

والطيب في الانذال ماهو بفايد

لو كان سجاد العلاقات ممدود

ناس(ن)علاقتهم تصفح جرايد

وناس(ن)علاقتهم مواثيق وعهود

والي يدور له صديق(ن)وكايد

يتعب قبل يلقاه والكايد ايكود

خصم(ن)بيان ولا صديق(ن)امحايد

لا هو بموجود(ن)وﻻ هو بمفقود