ياللي تقول إن المراجل كليفه

وش يفرق الشليان ولا الهلايم

اللي صبر يوم الليالي مخيفه

ماهو بمثل اللي يجر الهزايم

الشح مايبني قصور ٍ منيفه

والجود مافقر قوي العزايم

الأصوك اللي يعتزي به حليفه

ويجمل ربوعه نهار الكظايم

اللي نزع للحف شلفى رهيفه

مفتوقها يقصر رهيف الصرايم

واللي تقدم للمعالي بسيفه

حر ٍ يبوج متونها والخرايم

ينجى الشجاع اللي ثبت للنكيفه

والله يعين أهل الكرم والكرايم

يوم الردي كل المجالس تعيفه

ماهو يجمل في نهار الزحايم

ولاقضى لازم ولا سر ضيفه

يلحق خواله والعمام الملايم

لو كانوا أهل شداد ولا رديفه

ولا زحول ٍ من كبار العمايم

لكن تخير في الغصون الوريفه

وعذوقها الخضراء و كب الهشايم

ماطاحت أوراق النخل في خريفه

إلا مجانيها الرطب والنعايم

والدين طاعه يالقلوب النظيفه

يا حظ من قسمة مصلي وصايم

تراه رأس العلم وظلال ريفه

جناة عدن وخيرها فيه دايم

على دروب الخير مله حنيفه

وصى بها الهادي شروع وقوايم

وعلى المحجة والحدود الشريفة

حد ٍ بعد حد ٍ لو الجو غايم

عند العرب معروف وأذن خليفه

والحيدرة وعياله حروف قايم

والحق بين ماتعدى وليفه

علي بن حاسن تمام الدعايم