يا بري حالي منك واوجد عيني

متاك عن طول الجفا ناوي تعود

كم لي وأنا أكتم جوف صدري حنيني

وأضحك وانا أشقى حال من حال مضهود

وكم لي وأنا أدور سبب ياضنيني

خلاك تنسى ان بيني وبينك عهود

مضمونها حفظ العهد من يميني

وانك ما تسمع بي حسودٍ ومقرود

ياتل كبدي وينك اليوم ويني

لا هبت بريحك على خشمي النود

وذكرت وقتٍ كنت به تهتويني

ولا تردك دون ميعادي قيود

وذكرت يومك بالغلا تحتويني

وتقول وش دنياي لو ما أنت موجود

غير البلا وش عاد لي يا سنيني

الا الجروح وخافقٍ كله لهود

ناح الحمام وطاحت دموع عيني

ومال الغصن وأنا أتحرّى بلا فود

أتذّكر اللي فات واصفق يديني

مشتاق واحزاني على وجدي شهود

كني بفقدك فاقدٍ والديني

أو فاقدٍ بالضيق ذرعان وزنود

ما فيه هم الا وهو معتريني

وما فيه بابٍ جيته الا و مسدود

ومافيه صاحب شاف ماصار فيني

الا وقال الصبر له ياخي حدود

غابت نجوم الليل وانت تحديني

للموت ..حدو البدو لمشرّد الذود

وضاقت على الدنيا بشيني وزيني

وعادك من صدودك الى بُعد وصدود

حفظت حبك حفظي فروض ديني

وخليت لك سلك الغلا دوم ممدود

واقسى من غيابك وبيحة كنيني

وانك من سنيني ودنياي مفقود

اني ارقبك لليوم هذا تجيني

وما كني اللي امسى من الحب مجحود!