ما فيه احد نفسه رخيصه واذا كان

لقيت مرخصة النفوس إعتزلها

ترى شموخ الذات من قو الايمان

ومن هَمه العليا عرف درب آهلها

ندرك مقام فلان ونميز فلان

وماحن مثل بعض الرجاجيل بلها

اللي تســرحها بلا ســرج وعنان

وتضوي بهــا قــد البــلا مــنتولها

يا اصحابنا الغالين مهما الزمن شان

وجيـــهنا بنمــوت مــا نبتذلها

من صان وجهه لا تقولون وش صان

صان المروه يـــوم غيره خذلها

الناس في الدنيا لها اشكال والوان

وماكل من يطمح لحاجه وصلها

والمال لو خلا لكل اجرب لسان

وكبرت به نفوس الردى من جهلها

المال مايوهب قصير المدى شان

لا حذّفت روس النشاما عقلها

واللي شكوا الدنيا وجفوات الاوطان

والناس وظروف الحياه ومللها

قل اعملوا للمجد،، سيره وعنوان

يرى الله اصحاب اليقين وعملها

ماتستوي الدنيا على اي ميزان

ومهما تعدلها ظهر لك خللها

فاما ادفع سنينك لغاياتك اثمان

والا ارقد وخل المراجل لأهلها