يبقى النصيب اكبر من الحيله ومن عمـر الامـل

مهما طمح الانسان ماله في الزمن غيـر النصيـب

نـزرع امانينـا بشيمتهـا ونحصـدهـا فـشـل

كن الزمان الشين راسـم فـوق خطوتنـا رقيـب

ياكبر مافي خاطري المكسور مـن ضيـق وملـل

اللي تبناهـا الشقـا فينـي مـع الحـظ العطيـب

طال العذاب وملت الانفـس مـن قيـود الوجـل

لاخـل لامحبـوب لاصاحـب ولافزعـة قريـب

سئمت اعاتـب غلطـة الايـام بحـروف وجمـل

اللي رمتنـي بيـن صكـات التوجـد والنحيـب

ابني امل واهدم امل واعيش فـي محـور جـدل

يوحي الى اهـل الفكـر انـي بتفكيـري غريـب

أصادم اهل الفلسفه بإحسـاس مـن حـل وحلـل

اجمل من بروق المطر وابلغ من اقوال الخطيـب

يمكن زياده مـن ثقـه يمكـن تجـرد مـن عقـل

يمكن تهور مـن نتيجـة كبـت او فرقـا حبيـب

يمكـن ويمكـن بينمـا اواه مـن قـلـبٍ ذبــل

دار الزمان وضيّعه فـي غبـة الحـزن الرهيـب

أحاول ابعد مـن دروب الهـم واجـواء الزعـل

القى الزعل يأبى عن دروبي وعن جـوي يغيـب

الشمس في كبد السما والمـا بـري حالـي وحـل

وش يروي العطشان دام الطيب في ذا الوقت عيب

عشنا وشفنا يازمان الخوف فـي دعـوى الخجـل

اكبـر مراحـل للجبانـه دون شـك ودون ريـب

تجري السنين وتختلـف الافكـار علمـا لاجهـل

حيث التطور في الفكر من ميزة الشخص اللبيـب

لكن من اللـي يـدرك المبـدع اذا حظـه نـزل

او عاكسه ركب الزمان المـر والوقـت العصيـب

يؤسفني ان اللـي تخيرتـه مـن النـاس انخـذل

حتى وهو يعلم تمامـا كيـف اودي بـه واجيـب

ياوقت كم دارت علـي الدنيـا بلوعـات وجلـل

واصغر مصيبه جاتني هي صدمتي في اغلى صحيب

لكن قلوا لاهل الغـدر بـإن الجبـل يبقـى جبـل

وإني انـا قايـد وفـا فـي شبتـي والا المشيـب

وإني كسبت من الزمان رجال فـي قـول وفعـل

وإني جمعت من التجارب كنز في الواقع عجيـب

حصنت نفسي بالادب والصـدق واشعـار الغـزل

كما تحصن بـالادب حسـب إطلاعاتـي نجيـب

اعشق واغنـي للهوى والشـوق وامـات القـذل

واكره والوم ومرةٍ اخطـي وفـي مـره اصيـب

ما اشره على اللي من جهل يرمي على فكري الخلل

في لحظة إن فهمه لما في خاطـر ابياتـي يخيـب

الوقـت خـلا غايتـي قـدام وانسـانـي قـبـل

في منطلق فكري ولكن ليس في ساسـي العريـب

عشرين واربع من سنين العمـر فـي حسبـة ازل

راحت وانا ارسم للشعر دربٍ على المبدع صعيـب

ياشيب عيني كم حملت الـروع واتعبنـي الحمـل

رغم الصبر والجهد والعزه مـع الشـان المهيـب

إنسان واطمح في بيـارق حـق واطلالـة عـدل

تسمو بغايات البشر الـى العـلا مسـكٍ وطيـب

روم المعالي الكايـده طبعـي ومـن تـوي طفـل

وانا اعرف إني للادب ثروه ولا ادعي علم غيـب

لكـن تضيقنـي اصابـة فكـر قومـي بالشـلـل

تحت اندلاعات التخلـف والتخلـف شـق جيـب

أسأل زماني هل ويسألنـي الزمـن مليـون هـل

مهما طمح الانسان ماله في العمر غير النصيـب؟

واجاوبه يبقى النصيب اكبـر مـن حـدود الامـل

اللي رمانـي بيـن صكـات التوجـد والنحيـب