تمرني مثل العرب لحظات ضعف وضيق بال

واصد من دنيا العنا ويردني وجهٍ ندي

انا استحي وانا ادري اني ما استحي من ضعف حال

لكن علي حقٍ حقيق لكل طيب واجودي

صنع السعاده حاجةٍ مثل الظفر يبغى رجال

وانا ماحب اذخر كفاحي عن ربوعي وبلدي

المورقات من الشجر ياتي لفيتها ظلال

والشمعه المتوقده لازلت مودعها يدي

تِظلم واقول ان الضياع لكل مستبصر محال

وانا على ضي النجوم اسير يانجم الجدي

وش قيمة التاجر ولا له مع هل الطولات فال

وش قيمة الشاعر اذا ماكان نور ٍ سرمدي

لو تنهدم شُم الحصون وتنهدم شُم الجبال

ماتنهزم نفس العزيز اللي بربه مهتدي

الايمان جذرٍ من جذور الكبريا.. واهل الجلال

تحارب اسباب التعاسه حربها للمعتدي

وانا ما اخاف من السقوط اللي يجي يوم القتال

انا اخاف من السقوط وعاد سيفي في يدي