من قل حيله دون تحقيق الأحلام

زهد ولو ماله على الزُهد طاقه

كذا قضت في طبع الإنسان الأيام

كما قضت لأهل الجهل بالحماقه

يجري العمر ويروح عام ويجي عام

وأنا أكتم جروحي بصبر ولباقه

جربت كيف أعجل على الحق،،وأنضام

وعرفت ليه أشقى الطباع،،،الطفاقه

وجربت كيف أصبر على الظلم،،،منلام

وأخذ ما حقه لي الزمان برواقه

ليه البشر عجلين والعجل هدام

وليه البشر حرصين والحرص فاقه

وليه اكثر العالم إذا طاح ما قام

وما فيه مجد الا وقبله إعاقه

صديت وجهي عن رديٍ ونمام

وحلفت ما أخّيب ظنون الرفاقه

وأمنت بأن كثر المواجع والالام

لقلوب عشاق المعالي لياقه/

والناس لو فيهم وفيٍ ومقدام

الناس فيهم خاينين العلاقه

واللي يظن إن كل صاحب له حزام

لا من عليه الوقت ضيّق خناقه

لا بد يصحى يوم من سُكر الاوهام

على طعونٍ الاصدقا والصداقه

المال والدنيا شرت روس واقلام

وابليس زين للمنافق نفاقه

وانا على مبداي ثابت بالاقدام

والحر ما يثني عن الحق ساقه

ما الله خلق الاحرار للذل خُدام

الاحرار خلقوا للشرف والطلاقه

فاما نعيش العمر للشيمه أعلام

والا فتبكينا عيون الرفاقه