جنوب الجزيره 103 كلّما لاح برقٍ في جنوب الجزيره فـزّ قلبي مع البراق يبغى دياره والصدر من شجونه في شهيق وزفيره ضايقٍ من ثيابه ويتفلّت زراره ديرتي في الجنوب وعزوتي والعشيره لو يقولون طارش ما نسى القلب داره ان خذتني ظروفي قلت في الامر خيره ون دعتني دياري قلت باعطي بشاره مسقط الراس عندي مثل سيف وجفيره لي خلص من لزومه في جرابه قراره من يلـوم الغريب اللي تباعد مصيره غادر القاع شرق وبدّل ارضــه وجاره لكـن عروق دمّي في بلادي اسيره كنـّها في الحظر من دون عسكر خفاره كيف ينسى المسافر بـيـت جدّه وبيره كيف ينسى السواني قبل وقت الحضاره كيف ينسى الجبال الشامخات الوعيره كيف ينسى الشعاب وراكـها والحجاره كيف ينسى السحايب والغيوم المطيره مشيها في سماها كنْه جرّ الستاره يوم هلّت بردها والحقوق الغزيره تـعتـزي بالرواعـد غارةٍ بعد غاره المناشي تـنـشّ بسيل تسمع خريره والـروابـي تـبـلّ اريـاقـها و الزبـاره وردها في شجرها فاح ينثر عبيره والرياحين في الوادي تزيد بخضاره يرتوي كل وادي ويتفايش غديره يسقي المجدب من القاع ويروي قفاره المزارع يحمّ القاع ويذرى شعيره يسقي ارض النخل والعجّ يركد غباره ويتباشر به البدوان ويعمّ خيره وتغدي نبتته لولو يزيّن محاره ترزم ابله ويردفها القعـود بهديره لو يزغرد حوارٍ درهمت له حواره والعرب تكرم الراعي وتطلق بعيره قبل ما ينتق حباله ويقطع هجاره صوب نجران تومي بي ضلوعي القصيره نبض دمّي توجّـه صوب داري مساره نبضة الشوق سارت عبر موجة اثيره عالية في التردد ، واضحة في الاشاره كلّ مـرّه ازوره ، خايف انها الاخيره كيف والقلب يحيى ميّته بالزياره العيون المحبّه عن عيـوبه ضريره والقلوب الشجيّه بردها في الحراره ما نفتني المشاكل والامور الخطيره حلّها عند ربّي ، و التغاضي شطاره الهموم اتتفـرّج والكسـر له جبـيره والعقول الحكيمه ما تشيع الشراره دار يام بن يصبا والجنابي البتيره دار همدان بن زيد ورموز الجساره دار من يحتمي الحدّ بسيوفٍ شطيره دار من يعسف ليوم الملاقى مهاره ممتلين المحازم بالعدد والذخيره منعشين المراجل بالجـَهَـد والخساره سوقهم للقبايل مصدر امن و ستيره قبل وقت الحكومه والقصر والاماره ون زبنهم ضعيف تنام عينه قريره ون حربهم حريب سبّبوا له دماره يحضرون المواقف ، والجموع الغفيره خدمةٍ للمقدّم من يمين ويساره الشباب ايتثنّى في الامور العسيره تحت ظلّ الحكيم اللي مشيبه وقاره والولد في شبابه يرتكي للكبيره ضاري ٍ بالمراجل خايضٍ للمكاره وارثٍ للمكارم بالنسق والوتيره خدمة الناس هـمّه والرجوله شعاره عارف حقوق ربعه ، وحبطاه وقصيره ما يخون القطير وما شكى منه جاره بنتهم من حياها للنزاهه سفيره اسمها عزوةٍ لاهل السطر والنعاره النجيب الكحيله بالعوايد بصيره منـبعٍ للكرامه والشرف والطهاره هـذي ابيات شاعر والمشاعر تثيره اشغله حبّ داره عن طموح التجاره لو تطول المسافه حبّها في ضميره بانيٍ وسط قلبه فلتين وعماره
ملحمة نجران