خطك لفا ياحمود والنذل يفداك

وفهمت انا معنى الكلام النحاوي

وتوي عرفت أنك سفيه بمعناك

ولاتحسب أنك في كلامك رهاوي

وان كان تبغى النصح حنا نصحناك

واخذ كلام الصح صدق شفاوي

وإياك لا تفطر عيونك بيمناك

واترك كثير الهذرمه والهذاوي

وابليس لايرميك في بير الادراك

وتراك فيما قلت بالقيل غاوي

وأنا نذيرك يابن الأمجاد وانهاك

هدية ان كان تبغى الهداوي

وان طعتني ولا ترى قداك ماجاك

وربي حذف بك في كبير البلاوي

ياما وياما يالسنافي ذخرناك

في حشمه الممدوح عطب الاهاوي

لا شك خليناك من شأن ذولاك

ربع لهم ورد بيوم العزاوي

ياحمود يا مسكين ياما تركناك

مسكين ماتحمل ركوب ونخاوي

أخذ كلام الصدق ماهي حكاياك

كلام من هو مقعد كل داوي

والله لو نبغيك ان يطنب رغاك

وتقعد على المرحان ياحمود ثاوي

وان كان قصدك قيل حنا عطيناك

كانك لنظم القيل طرب وهاوي

ترى مثير السؤ جابك وخلاك

خلاك في جو وحيد خلاوي

ذكرت حمي ليت حنا حضرناك

حتى تضيع مروتك والهقاوي

ياليت حنا يوم جيتو نطحناك

حتا مايبقى لجمعك شلاوي

واذكر نهار بلهليطه جزرناك

طرحناكم مثل الخشيب متساوي