الفكره اللي تنولد من غثا بال

اقرب لنزف الروح من أي حاجه

وانا نزيفي لا امتلا الصدر ولوال

مشاعرٍ فيها حزن وابتهاجه

تناقضٍ يدحم ضلوعي على جال

وثورة هواجيسٍ وساعة مواجه

عيال سمحين النبا طيبة فال

بس الزمان ابطى معقد حجاجه

ولانيب لا الاشتر ولانيب مرقال

اسل سيفي واتغشى العجاجه

شاعر وتغريني عريضات الامال

لو مانشدت المعتصم عن خراجه

حقي على دنيا العنا حق رجال

ماهوب حق متبعين السماجه

وجه الزمان الشين باهت ولازال

قلبي مواصل في الحياه احتجاجه

ومانيب من صكة غرابيلها ذال

لكن لكلاً في الحياه احتياجه

طال الكفاح وطال ليل العنا طال

والله يبدل ضيقها بانفراجه