يا خاتمي ، هاك الكلام وثيق

من فضّة وفصّه عليه عقيق

.

يليق بك ما لا يليق بغيرك

واليوم يومك والمقام يليق

.

ما كلّ صاحب يِحسَب انّه صاحب

وياكم رفيقٍ لك مهوب رفيق

.

لا تامن اللي خوّته مشبوهة

واحذر عدوٍّ في ثياب صديق

.

واستامن اللي له طريقٍ واحد

وابعد من اللي كلّ يوم طريق

.

وانصد دروب السّعة واسهجها

ما لك ومال اللي عليك يضيق

.

واهرب من دروب الهوى واحذرها

لانّ الهوى بيرُ ومداه غميق

.

كم واحدٍ كانه خبير سباحة

يوم انطمر جانا نعاه غريق

.

لي شفت لك خطوى غزالٍ شارد

فاحذر من النظرة تزيد بريق

.

لا يجذبك منّه طويل الجاعد

ولا المعنّق لاستدار دقيق

.

ولّا المشي والخطوة بخطوتها

مثل الغزال اللي يسير رشيق

.

واحذر من عيونٍ تردّ النظرة

ترميك في غورٍ مداه سحيق

.

واعرض عن الشفّة ولا تقربها

حتى ولو كان المذاق رحيق

.

وانّ التهوّر والشجاعة شتّى

ما بينها خيط وتراه رقيق

.

إن ردّك الدين فجزاك الجنة

ولا المروّة والمجال طليق

.

مبداك لا تنسى رفيع المبدا

واحذر ترى بعض الامور حريق

.

واسلم من حمولٍ تهدّ المبنى

لا تحتمل ما لا قواك تطيق

.

واذكر ترى الدنيا مثل نسمتها

والروح راحت في زفير شهيق