ناس ٍ تبيع وبيعها بالمزادي

وناس مع ليام تاتي وتشريك

تروح من كيفك ترى الوضع عادي

أهم شيء إنه قرارك ومرضيك

قلبي من شهور ٍ يقل العنادي

لاعاد تقصيني ولاني بمقصيك

لاصرت ماتتبع هوى كل وادي

مره ينحي بك ومره يّعليك

إما عذرت وقلت كبوة جوادي

ولا نسيت إني حبيبك ومغليك

أمس ٍ تربعت الحشى والفوادي

والليل كله عايشه بين اياديك

حتى وراسي فوق جنح الوسادي

يقبل فضاء طيفك وكني أحاكيك

واليوم بمشي وإن تحقق مرادي

وافي وفعلي ماترده هقاويك

وإن جات فرقى عاش حتى الجرادي

وكل ٍ على الله عيشته والتهاليك

جثمان حبك في الصحيح الوكادي

بشّيعه وابث حزني واعزيك

وفيك العزاء سنه وطبع ومبادي

وناس ٍ تواسيني وناس تواسيك

وايامنا تبطي وحن في حدادي

يكفيني الماضي ويكفيك ماضيك

يابعدها ماهي بحول السدادي

قد قالها راعي المثل قبل طاريك