ابدا بذكر الواحد المعبود رب العالمين

وبلادنا مربى الجميع الله يديم اعيادها

والله يلهمنا طريق الشاكرين الذاكرين

والله يكفينا مقاريد البشر واحقادها

نلهج بذكرك يالعزيز الملتجى وانت المعين

انك تعز المملكة وترد كيد اضدادها

المملكة دار النبي ذخر العرب والمسلمين

سلمان زيزوم المكارم للمكارم قادها

ابو فهد حرز الوطن رمز الوفا دنيا ودين

مناسبات الخير جعله دوم من عوادها

سلمان سلمان السعد بالمعترك قد له سنين

لاكبرت القالات يعرف كرها واسنادها

متمرسٍ بالحيل يخلف هقوة المتمرسين

وانا عالت العيال يكسر زومها وعنادها

ومساعده حضرة ولي العهد ساعده اليمين

يثبّت الخطة ويعرف عمقها وابعادها

محمد اللي يقمع العدوان بالجمع الرزين

قواتنا تنقاد له ضباطها وافرادها

نعم سموه للوطن مع والده راسٍ وعين

حامي عقاب الجيش الا حفيت وكثر اجهادها

واميرنا الفذ جلوي للمنطقة درعٍ حصين

تامن به الديرة ليا وصل الفتيل زنادها

ابن مساعد يدحم العدوان بالجنب المتين

ايضا الإرادة والإدارة فذّ من روادها

وابوه قبله مع معزي سل مذلوق العرين

يوم الدخن ثاير ولا تبغى السيوف أغمادها

ومساعدة تركي ولد هذلول بالمنصب قمين

عوص القوافي في سموه يسهل استطرادها

ضلعٍٍ زحوم وراحته تندى عسى ايامه سنين

تلوذ به ذيك السواعد يوم كثر اجهادها

حكامنا اللي بالهجير لشعبهم مثل الغشين

ال السعود اللي نثاري كلنا بامجادها

ماهمنا من هو تردى واتخذ خصمه خدين

بعض الأوادم ما تروق الا مع جلادها

هذا قليل من كثير وجوهر المعنى يبين

والعلم له درة ثمينة صادها اللي صادها

الله يلهمنا بدنيانا طريق الغانمين

من سار معها فاز بالجنة وطيب برادها

والصدق والطاعات نباتٍ تغانمها الذهين

ياوي والله وردةٍ ماينتسى ميرادها

يامبختك ياللي حباك الله بر الوالدين

بنك الحساني فيه حسناتك تزيد اعدادها

الله يكفينا شرور العالم المتربصين

اللي مباديها تغذي غلها واحقادها

تمارس الطبع اللئيم يسوقها الحقد الدفين

على جميع المسلمين شعوبها وبلادها

والحمد لله شعبنا واعي ومنهجنا يمين

وخصومنا نعرف تقاطع سينها مع صادها

متماسكين وكلنا بالمعتقد متمسكين

نفوسنا متفائلة بالخير والله زادها

لكل شبرٍ في جزيرتنا يسابقنا الحنين

جذوة ولاء ماتنطفي والنار من وقادها

ازف للشعب السعودي والنشاما حاضرين

اجمل عبارات التهاني والرحيق مدادها

ذا الليل مثل العيد له بهجة وله طعم وخنين

ينوج مثل المسك ودلالٍ يفوح قنادها

يوم الوطن غالي وكل الشعب له متحمسين

يكفي صغار السن للي يرصد استعدادها

على جبين الطرس زان الجرس والمعنى ثمين

والمفردات استرسلت عشراتها واحادها

مع فرجة المعنى هجوس الشعر همّت بالقرين

لا جيت ابا اكرنها عن الدرهام زاد عنادها

لكن مع هذا استميح العذر واصدغها يمين

واريّح الوجنا وانزّل خرجها واشدادها

الى هنا كافي مادام أن فيه غيري مبدعين

اخر عبارة في سياق ننصوصنا ميلادها

وختامها صلوا على المختار سيد المرسلين

عداد من عمرٌ بيوت الله ومن يرتادها