ابوي حلحيلٍ علومه بعادي هذه الأبيات رثاء في والدي
400
ابوي حلحيلٍ علومه بعادي
شوحه بعيد ويرتكي للمخاسير
ملفى الركايب للغدا والقوادي
هذي يوردها وهذي مصادير
هذه الأبيات رثاء في والدي الشيخ / حمدان بن محيريق بن ناصر – رحمه الله رحمة واسعة – الذي وافاه الأجل المحتوم يوم الأثنين الماضي الموافق ٤ ربيع الأخر عام ١٤٣٨ هجرية :
خل الدموع بسجنها الانفرادي
مهادنة للظرف ماهو بتوفير
اكنها والقلب حاديه حادي
ابغى عزا الوالد يعدي على خير
انا ادري ان الظرف ماهو بعادي
احيان حتى الصبر يحتاج تصبير
راحت صناديق الضماير ديادي
والجاش كن بداخله لاهب الكير
العين تنزف قبل ينزف مدادي
تنزف ولو طاح الرشا والنواعير
ياكثر عيلات الزمان الرمادي
بعض الظروف تقول للصبر بكّير
لكن شكوانا لرب العبادي
هو الذي بيده جميع المقادير
الحزن عم ربوع حضر وبوادي
يبكون ابو سالم وجونا طوابير
الناس تبكي والشجر والجمادي
ومن غيبته بدر الجنوب اصبح بدير
ومدور العيشة حضر واستفادي
واصحابنا ماحسبوا للمشاوير
ايضا البراقي والهواتف تنادي
من الرجال اللي لهم كل تقدير
جات التعازي من ملوك البلادي
ومن القصيم وقصر دسمان وسدير
واميرنا ذربٍ عليه اعتمادي
قام جلوي بالطيب من دون تاخير
جتنا وفود الناس من كل وادي
قحطان والعتبان وهذيل ومطير
الله يرحم تاج راسي سنادي
زيزوم ربعه بالسنين المعاسير
ابوي حلحيلٍ علومه بعادي
شوحه بعيد ويرتكي للمخاسير
خذا جميع سمات الاحنف وزادي
فذٍ صدوقٍ وافيٍ منهجه غير
ملفى الركايب للغدا والقوادي
هذي يوردها وهذي مصادير
حرٍ قطامي من صقور الهدادي
نادر وعضد له محيريق وحمير
عون السجين اللي برجله قيادي
ذخره ليا هبت عليه المعاصير
شيخٍ لربعه محزمٍ للثنادي
وهم بعد مثله قروم ومناعير
وافي وهم شرواه خطلان ايادي
الكل منهم له مكانة وتاثير
خدم بني عمه وذب المبادي
بالخير يسعى بين الاجواد ويشير
غيثٍ على الديرة لنوه تمادي
يرف ويجي له مخال وتباشير
طلعه كسى التاريخ عنبر وكادي
حسناه بقلوب الرفاقة نواوير
مع القبيلة بالجبل والحمادي
ياقف لو الوقفة وراها محاذير
وان شاف في دنياه كبوة جوادي
غض النظر عنها وقبل المعاذير
عنده كرم حاتم وصبر المهادي
اقولها واكرر العلم تكرير
يقدح فلاحه مثل قدح الزنادي
علمه تبين في زمان المشاهير
عاصر علومٍ مرمسات وجدادي
وجميعها صارت بوجهه مغاتير
صان الامانة والعهد والودادي
ولاه له باقصى سويداه تاطير
غاب وعوضنا فيه راع السدادي
العود راعي عقربة معدن الخير
عمي عصابة روسنا الذرب هادي
تبنى له البيضا وللعلم تبرير
وابو فهد سالم لـ ابوه امتدادي
شوق المواقف والبني الغنادير
انسان متوازن ورجلٍ قيادي
عنده لصعبات المهمات تدبير
وعبيد البالود راعي الشدادي
ومحمد اللي من جنوب الفناتير
واخواننا الباقين اسود عوادي
فيهم نضاعف هقوة الطيب وتصير
يالله عسى ليلٍ ترزم وجادي
يمطر ويسترسل سواة النوافير
على قبور مخضبين الهنادي
شيباننا اللي يحتمون المظاهير
فارس وسالم حبهم في فوادي
ونشمي وابن هادي وحمدان وعوير
كما ان خالي بالمكان الريادي
اللى محله مدهلٍ للمسافير
بالخير وبحسنات طه وصادي
همّل عليهم يالسحاب المزابير
كتبت في منزلنا في محافظة بدر الجنوب يوم الجمعة الموافق ٨ ربيع الأخر عام ١٤٣٨ هجرية .
يحيى بن حمدان بن محيريق
ملحمة نجران