تنحّت بي الصدفه وكف القدر مجهول

وجيت المكان اللي زرع فيني الحسره

بعد غيبةٍ تاريخها اليوم سابع حول

فراقٍ طويل يعيننا الله على صبره

تأثرت والذكرى غزا حظي المشلول

على منعطف حبٍ تنحت به الهجره

غرام توارى واختفا مابقى له زول

توارى بعد ما أعطاه وجه الدهر ظهره

وانا داخل اطلاله تمشيت عرض وطول

اكيل الندم واناجي الحب في قبره

وقفت اتفكّر بالفوارق وانا مشغول

فوارق ظروف الامس واليوم والبكره

مناظر تذكرني زمان الهوى المقتول

بتاثيرها زّف الشجن دمعة العبره

دموعٍ تفيض ارواحها وش لقت ياحول

تعانق حروف اسم نقشته على الصخره

واخيرا رجعت اشيل حمل الندم مدبول

اغض النظر بالحيل والنفس منكسره

الا واسفا بالحال عزاه وايش اقول

رضيت الصبر مجبور لو الصبر جمره

بذلنا جهد ننسى فلكن بلا محصول

خياله تصور لي على البيت ابو سدره