قال ابن بطنين يالله تغفر ذنوبه

يالله يا واحدٍ يارب ياوالي

ياجاليٍ همه ويا قابل التوبه

يافارجٍ كربته في وقت الاهوالي

هاضتني ابيات ابن مهذل ومكتوبه

في مدح يام العريبه قوم الابطالي

“يايام ياللي عطيتوا الحق ماجوبه

وسيوف يامً تطوع كل عيالي

لما درج بينهم شورٍ تمالوا به

ماهو يدور البرايز كون عقالي”

وان دلهم راي للناموس وصوا به

وثلين في شورهم للعز عجالي

كلاً على نيته نسقيه مشروبه

العقل للعاقل وللجهل جهالي

أفعالهم في اليمن والشام مكتوبه

والترك تشهد لهم ذربين الافعالي

إن صبحوا حفهم ولا تعشوا به

ظفرين ليقد صفق جالٍ على جالي

من جرب الحرب معهم شقوا جيوبه

عاف الحرايب وصك الباب باقفالي

ومن عاش في سلمهم تسربل بثوبه

لا سلّ جنبيته ولا سهر قالي

لا غمغموا باطلٍ والحق عيّوا به

والحدّ من دونه البارود وسلالي

شبّوا على العز والشيبان شابوا به

عزٍ على عزّ الاوّل يرّث التالي

قلته وانا لابتي في يام محسوبه

صقريّةٍ حايمين المرقب العالي

راياتهم في محافل يام منصوبه

ومن الشرى حدهم ليربعها الخالي

والجدّ جدّ الكرم والشعر من صوبه

يالله لك الحمد لي جدٍ ولي خالي

منصور ياللي عجزت أشوف عذروبه

مالك عذاريب بين الناس تنقالي

سلّم على ابوعلي وعطه مطلوبه

ثم قل له اني شريت رضاه بالغالي

وصلاة ربي على المرسول مندوبه

محمدٍ واهل بيته ختم الاقوالي