لساني بالدعاء يلهج لفردٍ طالبه ماخاب

مادام ان الدعا للمعضلات الكايدة حلا

دعوت الله دعوة مسلمٍ تفتح لها الابواب

عسى ربي يعز الشجرة اللي جالها ظلا

اخو نورة مؤسسنا معزي مجري الهياب

ذلوله بالارادة للمعالي تلها تلا

رحل عنا ومن بعده تجلى دور اسود الغاب

وتعدت راية التوحيد واشنطن ومانلا

ذرانا في زمانٍ مابقا للناس فيه اعصاب

دباديبه كثير وضاع فيه الشيخ والملا

اي والله هم ذرانا لا ارتخى البرطم عن الانياب

اهل سربة واهل حربة وعون ولون للكلا

عيال العود خطلان الايادي صفوة الانساب

حماهم لن قبس نار الدخن مرهوب ومخلا

ذولا شرابة الفنجال ماهم شاربين انخاب

محى الله سكة اللي عن طريق المجتمع ضلا

غثيثٍ تخدع العالم عباراته وهو نصاب

يبينا نلعب الدومين وان جاه السرا جلا

ينادي بالجهاد وكل مرة سجلوه غياب

بلندن ياكل البفتيك لاجاهد ولا صلى

حشى لله مايضحك علينا الفاسق الكذاب

زمان الكذب واعوانه وتضليل البشر ولا

اجل مايستوي ذاك الطمان وعالي المرقاب

ومن حاول يجادلني بهذا قلت له : كلا

غدت كل الطرق وحدة طريق البار والمحراب

بتوجيهات ابالسةٍ قتلها الحقد والغلا

على مرالعصوراهل الفتن متكالبة واصحاب

من العرعور الى عزام ومعمر وابن بلا

على جرتهم اوباشٍ بلا مبدا ولا هنداب

اذا قلنا السفر ماهو كما الظلمة تقول : الا

نكرات طلاسم مالهم موقع من الاعراب

بعضهم وده يدش السجن ويصير ماندلا

مع ذا العينة مس البطان وصلفح المشعاب

لأنك لو نصحته جاك عقل البوج مرطلا

علينا واجبات وكل ابونا ندرك الاسباب

طلايعنا تصد الحف ولنا عمق ومتلا

نعم كل الحمايل نعتبرهم حضرة الغياب

مدام بعهدنا الزاهر جميع الخير منهلا

تحت راية زعيمٍ للمكارم كلها عراب

مليك الدار سلمان الحزم مثل القمر هلا

على كفه نداويٍ يطس الخرب بالمخلاب

مثل جده ترى العقبان عن مرماه تنجلا

نعم في عهدهم خيرٍ مجاله يتعب الكتاب

نقلب في نعيم وغيرنا يرقد على السلا

كما ان الصرف في خدمة بيوت الله بدون حساب

وحتى بالهجر كلٍ بنى له قصر ومصلى

الا مديت طرقي يحتويك الود والترحاب

والا صليت بين اثنين ذا هلا وذا هلا

بلدنا قبلة الدنيا وحنا محور الأقطاب

وحنا ذخر من عن لابته منبوذ ومجلا

ثقافتنا وملتنا مكارم كلها واداب

مجالسنا كبار وضيفنا يقلط على الزلا