يابو جرح بالله خل الاوضاع سريه

بربك على جرح الهوى طبق اجفانك

بصدر(ن)رحيب ونية الخير مجزيه

توكل على الفرد الصمد يجبر ايمانك

جروح الزمان تموت بالصدر مخفيه

اخير الك من كشف السراير لعدوانك

تخلص من اضعاف الحلوم الخياليه

بقوة عزم وافرض على النفس سلطانك

يابوجرح لا يدمى ولافيه ماريه

عدوك زمانك وافي العهد ماخانك

انا الي جرحت بسيف من لا غدر فيه

بعفوك تجاوز عنه يارب سبحانك

وياجارحي دوك التنازل بلا ديه

انا خابر(ن)جرحي بعث خافي اشجانك

بحكم السفر سيفك طعني بعفويه

على غير قصد اوردت شلفاك وسنانك

سببها ان املنا فالبقى معجزه عيه

ومن المستحيل انك تغادر عن اوطانك

وانا يمكم مستقبلا مااقدر الجيه

لوني مثل حوت(ن)حياته بخلجانك

ظروفي تنحت بالجسد عنك مو ليه

وروحي لك اقرب من عيوني لحجانك

على خير قررنا السفر للسعوديه

رجاء فلا تبخل على النفس باحسانك

وانا كل ماارجو منك حاجات رمزيه

نشيد بها ذكراك في بحر نسيانك

بلاش انتعلق بالحلول الفضوليه

حلول(ن)مع التنفيذ تلفظ بعصيانك

فلو قلت لي خلك معي ماحصل ليه

ولو قلتلك هيا معي ليس بامكانك

مطاليب ماتصمل ولاهي بمقضيه

سوات الحلوم وطيفها ماقضى شانك

تفضل وسجل لي عبارات وديه

على البوك الازرق سجل اسمك وعنوانك

عباره من اجل الحفظ بحروف خطيه

على الطرس ولا من ورق سدر جيرانك

وعطني بربك من لباس البدن طيه

لاني كما تعلم تاثرت بالوانك

من الجيب ولا معطفتك الرماديه

ولا صعب هذا زر من صدر فستانك

هدايا الغى لوهي بسيطه وعاديه

يصح البدن من شوفها صحة ابدانك

وعطني لجل ذكراك لقطات شمسيه

لشخصيتك ولا الصغير من اخوانك

تكرم وانا بعطيك كلمه حقيقيه

اذا غاب رسمك صورتك تشبه انسانك

الى دقت الذكرى الجرس دقة(ن)حيه

وقامت عيوني تنثر الدمع من شانك

ابا انظر واكلمها برقه وحنيه

عساها تكلم بالنيابه عن السانك