رسايل الشوق هذي كيف تقراها

يا اللي لك سنين لاصاحي ولا نيمي

الله يسقي سنين الحب ما احلاها

ايام رمسك زمان الغيم والديمي

ذيك السنيات تشجيني بذكراها

ضاعفت فيها الامل لين انجلى ضيمي

حنيت للمرحلة قبل اتعداها

قامت بتاميم وجداني وتاميمي

رغم الظروف العصيبة ماقدر انساها

يوم الشعر والنثر خدام للميمي

اسمك بحور القوافي هز مرماها

لين اصبح الميم نوته في تقاسيمي

لاف القريحة خنين الرند واشجاها

في حضرة الشال كنت استاذ وعليمي

كنت اسعد الناس كل الناس وابهاها

واليوم في كل حاجة صرت بوهيمي

لو نطوي الارض يابسها على ماها

ونضيّع الفرق بين السين والجيمي

حاجة طوتها الليالي كيف نلقاها

مثل المغاتير ماترجع مجاهيمي

يامدورين الظبا في غير مفلاها

بالبحر صيد الجوازي فن ترهيمي

كل المحيطات حتى لو ركد ماها

محال تلقون فيها ادْمي ولا ريمي (١)

ايضا بعد جرعة التذكار جدواها

معدوم لو كان تُشرب شربة الهيمي

هذي سنين العمر مهما احتضناها

رغم الحنين افرزت رحال ومقيمي

—

ادْمي – الغزال الجبلي ذو اللون الأحمر ..

والريم أو العفري – لونه أبيض وكان يوجد في السهول